Majan byin nga ai Ukraine kaw nna Russia drone ni NATO makawp ginra de tawt lai shang wa ai hpang, wuhpawng lahkawng lapran hpyen masa shaja hkat wa nga sai.
Dozen kahtap Russia si-hkam drone (one-way attack drones) ni gaw September 10 ya shani NATO hpung shang, Poland mungdan kata Lublin ginra hta hkrat kapaw ai lam nga sai.
Dai hpe matai htang ai hku nna, NATO gaw Russia drone yu sin dap hpe Poland hte Baltic mungdan ni (Lithuania, Latvia, Estonia) kaw jahkrat na matu “Eastern Sentry” hpaw dat sai lam, September 12 hta ndau dat masai.
Hpyen n-gun hku nna, Denmark na jet F-16 lahkawng, France kaw na Rafale jet masum, Germany kaw na Eurofighter jet mali, hte UK kaw na mung jet ni shanglawm na re lam, NATO ndau ai re.
Ndai ten hta bai, Russia drone ni gaw kaga NATO malawm Romania mungdan kata de September 13 ya shani jahte tam tawt lai shang ai lam nga ai hpe Ukraine gumsan magam Volodymyr Zelensky tsun wa sai.
Ukraine kaw Russia shabyin dat ai majan jahkring kau nhtawm simsa lam jahta na matu, US gumsan magam Donald Trump ra sharawng dip n-gun jaw nga ai re.
Dai re majaw, Russia gumsan magam Vladimir Putin hte alak mi, Alaska kaw, Trump-Putin Summit hpe August 15 hta galaw sai raitim hpa mahtai n lu ai sha ginchyum dat ai.
Raitim laklak ai lam gaw, dai zuphpawng ngut ai hpang, Russia gaw Ukraine hpe madang sharawt gasat wa ai sha n ga, ya, NATO malawm mungdan ni de du hkra drone shapyen bun let hpyen man maden shakut ai lam galaw ai rai nga ai.
