မြန်မာစစ်ခေါင်းဆောင် မင်းအောင်လှိုင်တပ် စစ်ရေးလှုပ်ရှားလာလို့ KIA ဦးဆောင်တဲ့ တော်လှန်ရေးတပ်နဲ့ မေ ၂၊ ၂၀၂၆ စနေနေ့က ဗန်းမော်မြို့မှာ တိုက်ပွဲ ပြင်းထန်စွာ ဖြစ်ပွားခဲ့တယ်။
မင်းအောင်လှိုင်တပ်ဘက်က အထိနာပြီး သေဆုံးတဲ့အလောင်းတွေ မကောက်နိုင်ပဲ ပစ်ထားပြီးနောက်ဆုတ်လိုက်ရတယ်လို့ KIA ဗန်းမော်ရှေ့တန်း သတင်းရင်းမြစ်က Mungdan (မုန်းဒန်)ကို ပြောပါတယ်။
အလောင်းတွေပြန်ကောက်ဖို့ အင်အားနဲ့ ပြန်တက်လာစဥ် ကချင်လွတ်လပ်ရေးတပ်မတော် KIA နဲ့ တိုက်ပွဲ ဒုတိယအကြိမ် ပြင်းထန်စွာဖြစ်ပွားခဲ့ကြောင်း အဆိုပါသတင်းရင်းမြစ်ကဆိုပါတယ်။
နှစ်ဖက်တိုက်ပွဲဟာ တနင်္ဂနွေနေ့ ညနေပိုင်းမှာ ဆက်ပြီးဖြစ်ပွားတာ ရှိပါတယ်။
တချိန်တည်းမှာ ဦးမင်းအောင်လှိုင်ရဲ့ ရက် (၁၀၀)စီမံချက်အရ ဧရာဝတီမြစ်ကမ်း ကားလမ်းကြောင်းကနေ ကချင်ပြည်နယ်သို့ စစ်အင်အားဖြည့်တင်းတာမျိုး စတင်လုပ်ဆောင်တာရှိကြောင်းကို Mungdan လေ့လာသိရတယ်။
