September praw 9, bat Lahkawng Ya shani, Manmaw, Waimaw hte Hpakan, ginra masum hta byin ai majan hta Myen maga si hkala law wa sai.
Manmaw hpri-gang dap maga pru wa ai Myen dap hpe KIA pawng hpawm dap ni bawm hte hkap dem gasat ai kaw yawm dik marai mali si ai kaw dap up (tat yin mu)langai lawm ai lam, shawnglam shiga lawk hku chye lu ai.
Waimaw maga, Washawng lam, Lamyang de n-gun kaba hte lung wa ai Myen dap hpe KIA pawng hpawm dap ni pat hkum gasat ai kaw hpri-gang mawdaw langai hpe gap nat jahten kau lu ai lam, Waimaw shawnglam shiga lawk hku chye lu ai.
KIA zing madu kau ai, ga sau pru ai shara Pangwa, Chyipwi myune hte nlung ja pru ai shara Langse, Sawlaw myune hpe bai lu hkra nga, Myen hpyen chyawm tari Min Awng Lai a aming hte lai wa sai March shata kaw nna Lamyang-Washawng Lam de htu gasat nga ai re lam, ginra masha ni tsun ai re.
Jinghpaw mung sinna Hpakan lungseng maw hta San Chyoi maw maga n-gun 30 jan hte lung wa ai Myen hpyen hpe KIA pawng hpawm dap ni hkat gap ai kaw marai 20 hkawt si nna ngam ai ni hprawng mat ai lam, Hpakan shawnglam shiga lawk hku chye lu ai.
Ndai hpe matai htang ai hku nna Hpakan, byu-ha kawng Myen dap ni Seng Tawng mare hpe shading nna laknak kaba 20 jan lang gap bang ai kaw mungmasha marai 6 hkala hkrum ai lam, Seng Tawng mare masha ni tsun ai.
