ရုရှားနိုင်ငံ၊ Lipetsk ပြည်နယ်၊ Yelets မြို့ရှိ စစ်လက်နက်လုပ်ငန်းများအတွက် ဘက်ထရီနှင့် လျှပ်စစ်ဓာတ်အားပေး အစိတ်အပိုင်းများ ထုတ်လုပ်သည့် Energia စက်ရုံ အောက်တိုဘာ ၂၅ ရက်တွင် ဒုံးကျည်ဖြင့် တိုက်ခိုက်ခံခဲ့ရကြောင်း သတင်းများ ထွက်ပေါ်လာသည်။ ယူကရိန်း OSINT အဖွဲ့ Exilenova+ က ဒုံးကျည်အများအပြား ထိမှန်ပြီး စက်ရုံဝင်းအတွင်း မီးလောင်ကာ မီးခိုးများ ထွက်ပေါ်ခဲ့ကြောင်း ဖော်ပြသည်။
Lipetsk ပြည်နယ်အုပ်ချုပ်ရေးမှူး Igor Artamonov က Yelets မြို့၏ စက်မှုဇုန် တိုက်ခိုက်ခံရကြောင်း အတည်ပြုပြီး အရေးပေါ်ကယ်ဆယ်ရေးအဖွဲ့များ စေလွှတ်ထားကြောင်း ပြောကြားခဲ့သည်။ သို့သော် ၎င်း၏ ကနဦးထုတ်ပြန်ချက်တွင် တိုက်ခိုက်ခံရသည့် စက်ရုံအမည်ကို မဖော်ပြခဲ့ပေ။
တိုက်ခိုက်မှုအပြီး စက်ရုံအနီးကို ပိတ်ဆို့ထားပြီး လူနာတင်ယာဉ်များ သွားရောက်နေကြောင်း Exilenova+ က ဆိုသည်။ Storm Shadow ခရုဇ်ဒုံးကျည်များ အသုံးပြုခဲ့ဖွယ်ရှိကြောင်း စောင့်ကြည့်လေ့လာသူများက သုံးသပ်ထားသော်လည်း ဒုံးကျည်အမျိုးအစားကို အတည်ပြုနိုင်ခြင်း မရှိသေးပေ။ လူသေဆုံး၊ ဒဏ်ရာရမှုနှင့် စက်ရုံပျက်စီးမှုပမာဏကိုလည်း သီးခြားအတည်ပြုနိုင်ခြင်း မရှိသေးပါ။
Energiya သည် သာမန်လျှပ်စစ်ဓာတ်အားစက်ရုံမဟုတ်ဘဲ ဒုံးကျည်နှင့် အခြားစစ်ဘက်သုံးစနစ်များအတွက် အထူးဘက်ထရီများ ထုတ်လုပ်သည့် လုပ်ငန်းဖြစ်သည်။ ယူကရိန်းစစ်ထောက်လှမ်းရေး၏ အချက်အလက်များအရ ၎င်း၏ထုတ်ကုန်များကို Iskander နှင့် Kinzhal အပါအဝင် ရုရှားဒုံးကျည်စနစ်များ တွင် အသုံးပြုကြောင်း သိရသည်။ ထုတ်လုပ်ရေးအဆောက်အအုံများ ပျက်စီးခဲ့ပါက လက်နက်အစိတ်အပိုင်းထောက်ပံ့မှုကို ထိခိုက်စေနိုင်သော်လည်း ထုတ်လုပ်မှု ရပ်ဆိုင်းသွားခြင်း ရှိ၊ မရှိကို မသိရသေးပေ။
ရင်းမြစ်များ — Ukrainska Pravda၊ Kyiv Post၊ Exilenova+ နှင့် ပြည်နယ်အုပ်ချုပ်ရေးမှူး၏ ထုတ်ပြန်ချက်များ။
