Shanglawt ni dung ai, Waimaw-Kambaiti lam, Deng-13 Shagyit hpe September 11, jahpawt hkying 8 grupyin ten, Myen nbungli bawm wa jahkrat ai lam nga ai.
KIA maga si hkala lam n chye lu shi ai.
Shawng e Myen dap ni dung ai, Sadon-Chyipwi lam labra, dai shagyit hpe Wunpawng Mungdan Shanglawt Hpyendap, KIA kaw nna June 11, 2024 hta zing la ai re.
Mawdaw lam dingyang, ndai shangyit n du shi ai shara, Wuyan hte Lamyang lapran gaw Myen dap hte KIA pawng hpawm dap lapran, shani shagu majan laja lana byin nga ai re.
Myen maga, Myitkyina Dingdung Daw Daju, M.P.Hk, kaw nna lanak kaba gap garum ai lam hte nbungli bawm wa jahkrat ai lam ni mung, aten shagu galaw nga ai re.
Tinang tat sum ai ja hte ga sau nhprang pru ai ginra, Kambaiti, Chyipwi, Pangwa hte Sawlaw ni hpe bai madu lu hkra htu gasat nga ai Myen hpyendap hpe KIA ni ja ja shingdang gap ai majaw, majan kaba byin nga ai re lam, ginra masha ni tsun ai re.
