Waimaw kaw October praw 6, shana yuptung lai du hkra n yup n sha rai laja lana gap hkat nga ai re.
Majan gaw, madang shatsaw let kalang bai htu shadut lung wa ai Myen hpyen hpung ni hte Waimaw-Kambaiti lam, Lamyang kaw hkap shingdang ai, KIA pawnghpawm lapran, byin ai rai nga ai.
“Ya hkying 1 am du hkra n yup n sha gap hkat taw nga ai,” nga nna majan ginra na mung masha langai, Mungdan Shiga de tsun ai.
Wunpawng Mungdan Shanglawt Hpung, KIO uphkang Sadung mare hpe September 29 ya shani Myen hpyen jet lahkawng hte bawm kaba mali wa jahkrat kapaw ai majaw, masha 8 si nna marai 5 hkala hkrum wa sai.
Nhtoi bat mi hta, ya na zawn Myen hte Jahkung Ting Yung pyitusit pawnghpawm dap ni, bai lung wa ai majaw, Lamyang kaw ninghkap majan kaba byin nga ai re.
