Sagai Tai kata Banmauk myu hpe Wunpawng Mungdan Shanglawt Hpyendap, KIA dap hpawm ni kaw nna September 20, bat Kru Ya shana maga, atsawm tsepkawp zing madu lu sai lam, shawnglam shiga lawk tsun ai.
September 14 kaw nna myu zing majan baw hpang ai hta nhtoi bat mi laman padang dip zing madu lu ai lam rai nga ai.
Dai mare kaw dap jung nga ai Sam Hkyeng pyitusit (SNA) hte Myen hpyen komishin dap ni yawng, hprawng yen mat sai lam, shawnglam shiga tsun ai re.
Ndai ginra gaw Jinghpaw hte sai ni ai hpunau Kadu amyusha ni a shara rai nna Jinghpaw Mung dingda jarit makau nga ai re.
Ya na zawn NUG (Amyusha Gahkyin Gumdin Asuya) a Masat (1) Hpyen Man, Sagai Tai na Banmauk mare zing ai lam hte seng nna, NUG hte KIA tara shang shiga shapraw ai lam n nga shi ai re.
