မြန်မာစစ်တပ် ဗုံးကြဲမှု ထိုင်းဘက်ကမ်းအထိ ထိခိုက်၊ နေအိမ် ၁၇ လုံးနှင့် အများပြည်သူသုံးအဆောက်အအုံများ ပျက်စီး
မြန်မာစစ်တပ်၏ နယ်စပ်အနီး လေကြောင်းတိုက်ခိုက်မှုကြောင့် ထိုင်းနိုင်ငံ၊ မယ်ဟောင်ဆောင်ပြည်နယ်၊ စော့မွေးခရိုင်ရှိ မယ်စလဲပ် (Mae Sam Laep) ကျေးရွာတွင် နေအိမ် ၁၇ လုံးခန့်နှင့် ကျန်းမာရေးဌာနအပါအဝင် အများပြည်သူသုံးအဆောက်အအုံများ ပျက်စီးခဲ့ပြီး ဒေသခံအချို့ ဘေးလွတ်ရာသို့ ရှောင်တိမ်းခဲ့ရကြောင်း ထိုင်းသတင်းဌာနများက ဖော်ပြသည်။
အောက်တိုဘာ ၃၁ ရက်၊ ထိုင်းစံတော်ချိန် ည ၇ နာရီဝန်းကျင်တွင် မြန်မာစစ်လေယာဉ်က သံလွင်မြစ်တစ်ဖက်ကမ်း၊ မယ်စလဲပ်ဆိပ်ကမ်းနှင့် မျက်နှာချင်းဆိုင်ရှိ KNU ထိန်းချုပ်ရာ စောလဲသာစခန်း (Saw Lae Tha) ကို ဗုံးနှစ်လုံး ကြဲချခဲ့ခြင်းဖြစ်သည်။ ပေါက်ကွဲအားနှင့် ဗုံးစများသည် ထိုင်းဘက်ကမ်းအထိ သက်ရောက်ခဲ့ကြောင်း Khaosod English က ရေးသားထားပြီး မြန်မာသတင်းဌာန Myanmar Pressphoto Agency (MPA) ကလည်း ယင်းသတင်းကို ကိုးကားဖော်ပြခဲ့သည်။
မယ်စလဲပ်ကျန်းမာရေးဌာန၌ ပြတင်းပေါက်မှန်နှင့် တံခါးမှန်များ ကွဲအက်ကာ မျက်နှာကြက်တစ်စိတ်တစ်ပိုင်း ပြိုကျခဲ့သည်။ ဒေသအုပ်ချုပ်ရေးအဖွဲ့၏ အစည်းအဝေးခန်းမနှင့် ခရစ်ယာန်ဘုရားကျောင်းတို့လည်း ထိခိုက်ပျက်စီးခဲ့ကြောင်း ကနဦးစစ်ဆေးချက်များတွင် ဖော်ပြထားသည်။
တိုက်ခိုက်မှုနောက်ပိုင်း ဒေသခံအချို့သည် ကုန်းတွင်းပိုင်းရှိ အုပ်ချုပ်ရေးရုံးတွင် ညအိပ်ခိုလှုံခဲ့ကြသည်။ နိုဝင်ဘာ ၁ ရက်တွင် အချို့ နေအိမ်ပြန်လာကြသော်လည်း ထပ်မံဗုံးကြဲမည်ကို စိုးရိမ်သဖြင့် မြစ်ကမ်းဘေးဆိုင်များ ပိတ်ထားပြီး လှေပြေးဆွဲမှုများလည်း ယာယီရပ်နားခဲ့ကြောင်း MGR Online က ဖော်ပြသည်။
မယ်စလဲပ်ဒေသ အုပ်ချုပ်ရေးအကြီးအကဲ Pongpipat Meebenjamart က နယ်စပ်နှစ်ဖက်ရှိ ပြည်သူများကို ကာကွယ်နိုင်ရန် ထိုင်းအစိုးရအနေဖြင့် မြန်မာအာဏာပိုင်များနှင့် အမြန်ဆွေးနွေးသင့်ကြောင်း တိုက်တွန်းခဲ့သည်။ နယ်စပ်မှ ၁၀ ကီလိုမီတာအတွင်း ဗုံးကြဲတိုက်ခိုက်မှု မပြုလုပ်ရေးကိုလည်း ၎င်းက အဆိုပြုခဲ့ကြောင်း Transborder News က ရေးသားသည်။ ယင်းအဆိုပြုချက်နှင့်ပတ်သက်၍ နှစ်နိုင်ငံသဘောတူညီချက် ရရှိထားကြောင်း အတည်ပြုချက် မရှိသေးပါ။
အရေးပေါ်ရွှေ့ပြောင်းရပါက ထိုင်းဒေသခံများ ခိုလှုံနိုင်ရန် Ban Huai Kong Kat School ကို ပြင်ဆင်ထားပြီး မြန်မာဘက်မှ ထွက်ပြေးလာသူများအတွက်လည်း လက်ခံရေးနေရာ သုံးခု သတ်မှတ်ထားကြောင်း Thai PBS က ဖော်ပြသည်။ ဒေသတာဝန်ရှိသူများက ရပ်ရွာအတွင်း ဗုံးခိုကျင်းများ တည်ဆောက်ပေးရန်နှင့် ကြိုတင်သတိပေးစနစ် ပိုမိုကောင်းမွန်စေရန် တောင်းဆိုထားသည်။
KNU ပြန်ကြားရေးတာဝန်ရှိသူတစ်ဦးက ယင်းလေကြောင်းတိုက်ခိုက်မှုသည် တပ်မဟာ (၅) ၏ ရိက္ခာပို့ဆောင်ရေးနှင့် နယ်စပ်ကုန်သွယ်ရေးလမ်းကြောင်းများကို ဖြတ်တောက်ရန် ရည်ရွယ်ကြောင်း ပြောဆိုထားသည်ဟု Thai PBS က ဖော်ပြသည်။ မြန်မာဘက်ရှိ စခန်းအတွင်း ပျက်စီးဆုံးရှုံးမှုအတိုင်းအတာကိုမူ အတည်ပြုနိုင်ခြင်း မရှိသေးပါ။
