မဟာမိတ်တပ် ကိုးကန့်တပ်လို့ ခေါ်တဲ့ မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA) ဘက်မှ ရှမ်းပြည်နယ်မြောက်ပိုင်း တရုတ်-မြန်မာကုန်သွယ်ရေးလမ်းကြောင်းက KIA ဂိတ်စခန်းတွေ အားလုံးဖယ်ပေးဖို့ တောင်းဆိုမှုကြောင့် စစ်ဆေးမှုတွေအားလုံး ရပ်ထားရပါတယ်။
“လူ နဲ့ ဂိတ်စခန်းတွေကို ဖယ်ပေးတာမျိုး မရှိဘူး။ မူလအတိုင်းပဲရှိတယ်။ ဒါမဲ့ စစ်ဆေးမှူတွေ အားလုံးကိုတော့ ရပ်ဆိုင်းထားတယ်” ဟု တရုတ်နယ်စပ် စစ်ရေးလေ့လာသူ တစ်ဦး မုန်းဒန် (Mungdan) ကို ပြောပါတယ်။
ကွတ်ခိုင် နဲ့ မူဆယ်အကြား နမ့်ဖတ်ကာ (Namhpakka) ကျေးရွာကို ကချင်လွတ်လပ်ရေးတပ်မတော် KIA က ထိန်းချုပ်ထားပြီး စုစုပေါင်း ဂိတ်စခန်း ၃ခု ရှိပါတယ်။
MNDAA (Myanmar National Democratic Alliance Army) မှ ရှမ်းမြောက်ရှိ ၎င်းရဲ့ ညီနောင်မဟာမိတ် တအာင်းအမျိုးသားလွတ်မြောက်ရေးတပ်မတော် TNLA ရဲ့ တပ်စခန်းတွေကို အင်အားအလုံးအရင်းနဲ့တိုက်ခိုက်ပြီး TNLA (Ta’ang National Liberation Army) ထိန်းချုပ်တဲ့ ကွတ်ခိုင်မြို့ကို မတ်လ ၁၆၊ ၂၀၂၆ ရက်နေ့ သိမ်းပိုက်လိုက်တယ်။ တဆက်ထဲမှာ ကွတ်ခိုင်-မူဆယ်အကြား KIA ဂိတ်စခန်းအားလုံးကိုပါ ဖယ်ရှားပေးဖို့ တောင်းဆိုခဲ့တယ်။
ဒါကြောင့် Kachin Independence Army (KIA)မှ ၎င်းထိန်းချုပ်တဲ့ နမ့်ဖတ်ကာကျေးရွာမှာ “ည ၈နာရီမှစ၍ အပြင် လုံးဝ မထွက်ရန် နဲ့ အိမ်တိုင်း အိမ်တိုင်း ကတုတ်ကျင်းတွေတူးပြီး သတိပြုနေထိုင်ရန်” မတ်လ ၁၆ ရက်မှာပဲ အရေးပေါ် သတိပေးကြေညာချက် ထုတ်ပြန်ခဲ့ရတယ်။
အခုချိန်ထိ MNDAA က အဓိက ဘာအကြောင်းရင်းမို့လို့ KIA ဂိတ်တွေကိုဖယ်ရှားခိုင်းတာလဲ ဆိုတာကိုတော့ KIA ဘက်မှပြောကြားခြင်း မရှိသေးပါဘူး။
