Lahta Sammung Mungmyit Sinli ga e Kokang MNDAA dap gaw n-gun kaba hte, Balawng TNLA dap ni nga ai shara ni hpe gasat zing wa ai majaw, tinang ginra de n kap wa hkra, KIO sadi maja nga ai lam, chye lu ai.
Wuhpung lahkawng dap lapran, lamu ga ginra hte seng nna n hkrum n ra shaja hkat ai shata mi na ai hpang, MNDAA gaw TNLA lata kaw nna Kutkai mare hpe March 16, 2026, bat Langai Ya shani, gasat zing la sai.
Kutkai-Muse Pyihtawngsu lam ntsa na KIA shagyit ni hpe dawm kau ya na matu bat Langai Ya shani shiga shana wa ai hpe chye lu ai.
Dai re majaw, KIO uphkang ai Namhpakka mare hta hpyen masa sadi maja let nta shagu gaduk htu na hte shana hkying 8pm kaw nna shinggan de n pru hkawm na matu, mare uphkang rung, March 16, 2026 nhtoi hte ndau ai re.
Kokang-Balawng Manghkang Byin ten, Miwa gaw KIO hpe shaga hkrum
MNDAA-TNLA, jinghku dap shada, gasat hkat nga ten, Miwa gaw KIO hpe shaga hkrum nga ai lam, Mungdan Shiga sagawn chye lu ai.
Dai zuphpwwng nyut nna KIO salang bai nhtang wa sai lam chye lu ai. Hpa gabaw bawngban ai lam hpe garai n chyelu shi ai.
