September 28, Laban shani, Waimaw hpyen man de Myen hpyen nbungli ni bawm jahkrat let sa gap ai lam ni galaw ai.
“Daini mung nbungli grai, masum mali lang wa gap ai”, nga nna Waimaw buga masha langai Mungdan Shiga de tsun ai.
Myen nbungli ni gaw, Waimaw-Kambaiti mawdaw lam dingyang, shara la da ai, Wunpawng Mungdan Shanglawt Hpyendap, KIA hte daphpawm ni hpe sa gap ai lam rai nga ai.
Nbungli hte sa gap ai lam ni shani shagu ngu na galaw nga ai raitim, KIA daphpawm ni a ja ja ninghkap ai majaw, Myen hpyen komishin dap ni, Lamyang kaw nna n lu lai ai.
“Dai Lamyang kaw nna gaw aw gara hku nan n shalai ai hku nan rai taw ai. Kade ganaw naw jahpawt yuptung nsin nhtoi mi rai rai. Dai kaw shanhte kalang ganaw yang marai 20 jan jan si mat mat re ai,” nga nna lahta na buga masha bai tsun ai.
Ya Myen a majan masing gaw, KIA gasat zing la ai, manu dan ai ga sau nhprang (rare earth) pru ai Pangwa, Chipwi ginra hte nlung ja pru ai Langse, Salaw ginra ni hpe bai lu la hkra shakut ai masa re lam, ginra masha ni tsun ai.
Ndai ten hta sha, Manmaw hte Hpakan ginra lahkawng hta mung wuhpung lahkawng dap lapran, gasat gala majan byin nga ai re.
