US gumsan magam Donald Trump maga tsap nna asak ram conservative shawa lapran dan hkung ai, Slg. Charlie James Kirk, asak 31, gaw September 10 ya shani gap sat hkrum sai re.
Utah Mungdaw, Orem mare Utah Valley University (Utah Pa Dakkasu) e gang bang hkaw tsun hpawng galaw nga ai pinra ntsa e gap sat hkrum ai re.
2012 ning, shi a asak 18 nine hta, Charlie Kirk gaw “Turning Point USA” ngu ai conservative youth organization, hpe gin-run woi hpaw wa sai hte, ya ya ten nan mung Turning Point Action hpe lata tut woi awn nga ai lithkam, CEO, langai mung re.
“American Comeback Tour” lamang a daw chyen hku nna, Utah Valley University e hkaw tsun zinlum hpawng hta sat hkrum ai lam rai nga ai.
Ndai gaw “mungmasa a majaw sat ai (political assassination)” re nga nna, Utah Mungdaw Up, Slg. Spencer Cox hku nna shiga dap ni tsun masat ai re.
Charlie Kirk n nga mat ai majaw Kachin American ni lapran e mung yawn hkyen hkrum nga ai re.
