Myen hpyen asuya jet nbungli ni gaw, majan n byin ai, Miwa ga jarit KIO uphkang ginra Man Wing Gyi mare kaw August 14 ya shana yuptung aten, akajawng bawm wa jahkrat ai lam galaw ai.
Bawm sa jahkrat ai aten hta, Miwa gaw tinang Nongdao jarit kata de n hkra hkra, lamu de dat wan kaba (laser beams) gap shatu let masat kumla jaw ai hpe laklak lailai mu lu ai lam, myi-chyaw-mu ginra masha ni tsun ai.
Lawu na sumla gaw sakse re.
Ndai sat lawat yu yang, Myen a Miwa hpe shawng shiga shana nna galaw ai masa re nga nna, hpyen masa yu maram ai ni mu mada ai re.
“Bawm wa jahkrat gasat ai shara gaw, lai wa sai ten Myen hpyen gumshem dap ni shara jahkrat nga ai Kawng Hkan hte Hu Tung maga wa jahkrat gasat ai” nga nna KIO Kachinnet shiga shagrin ai.
Ya na zawn maja bawm sa jahkrat ai kaw, KIA hte mungmasha ni si hkala lam nga n nga hpe Wunpawng Mungdan Shanglawt Hpung, KIO shiga shapraw ai lam n nga shi ai re. Bawm wa hkra kapaw ai shara na sumla, sum hkrung ni social media hkan e pru wa ai lam hpe mung grai n mu lu shi ai re.
Jinghpaw Mung, Manje muklum, Man Wing Gyi mare hpe Wunpawng Mungdan Shanglawt Hpyendap, KIA, hte mungshawa makawp maga dap (PDF) pawng hpawm dap kaw nna, maning 2024 January 21 hta gasat zing la ai hpang, ya ten du hkra KIO uphkang nga ai Sammung jarit mare langai re.
“Wan Wing Gyi ginra gaw gasat gala majan byin ai lam n nga ai raitim, ya na zawn nbungli bawm wa jahkrat gasat ai majaw ginra masha ni grai myit tsang nga ai lam hte lit nga ai ni kaw nna mung ntsa hpyen sadi maja na matu tsun sadi jaw lam nga ai” nga nna KIO shiga tsun ai.
Matsing: Man Wing Gyi hpe Man Win shing n rai Manweinggyi ngu nna mung ka lang ai.
