Myen hpyen kongsi hpyen hpung ni du shang wa ai hpang, Hpakan kata Shanglawt ni n mai shamu ai daram rai nga sai.
Wunpawng Mungdan Shanglawt Hpyendap, KIA ni tsa lam shadang 60 jan ka-up da ai ngu maram lu ai, Hpakan lungseng maw hpe hpyen kongsi dap ni bai lu madu hkra shakut wa ai lam rai nga ai.
“Hpakan kata gaw Shanglawt ni n mai shamu ai daram rai sai. KIA post hte shagyit ni chyawm rai n tat shi ai raitim, hkawm sa hkawm wa grai yak ai maga re,” nga nna Hpakan ginra salang langai Mungdan Shiga de tsun ai.
April shata htum wa kaw nna n-gun tsa kaba hte hpyen man lahkawng hku Hpakan de htu lung wa ai, Myen hpyen hpung gaw, lam lapran KIA ni shingla gasat ai lapran, May 27 shana hta, n-gun 200 jan Hpakan mare byu-ha kawng hpyendap de du shang wa lu ai rai nga ai.
Dai hpang, company nkau hpe gap kapaw ai hte wan nat jahten ai lam ni galaw wa kaw mungmasha si hkala ai lam ni nga ai re.
Mungkan hta manu dan dik htum lungseng pru shara, Jinghpaw Mung, Ginsi du ni a lamu ga, Mungnawk Hkawng Uru Sengmaw Ga gaw Myen hpyen gumshem asuya hpe ja ja ninghkap gasat woi nga ai KIA a matu mung shang gumhprawng madung lu la shara langai rai nga ai.
Hpakan pru-shang chyinghka Hpakan-Kamaing lam, Hpakan-Nawnglut lam hte Hpakan-Sezin lam ni yawng hpe KIA hte daphpawm ni jum tek kau ai majaw, Hpakan mare hpyen kongsi dap ni, shinggan le hpyen hpung shamu shamawt n mai chyat rawng taw ai gaw aten loi na wa sai re.
Ya na zawn hpyen hpung n’nan du wa ai hpang, hpyen kongsi dap ni Hpakan kata hpyen hpung shamu shamawt lam bai galaw wa ai majaw KIA hte gap hkat lam ni byin nga ai lam, Hpakan buga masha ni tsun ai.
